ارجع بأه
ل جمال عبد الناصر
ارجع بأه
وفك حبل المشنقة
وامسح همومنا باللقا
يا جدرنا تحت التراب
يا حلمنا فوق السحاب
يا عمرنا طال العذاب
في الانتظار
رجعوا التتار
لكننا أشواك بتتحدى العطش
نسقط ساعات
لكننا نفضل كبار
نفتح عيون للانبهار
متشوقة
فارجع بأه
فارجع بأه
وفك حبل المشنقة
وارفع راياتك يا أبي
قريش بتسأل عن نبي
يهديها من بعد العمي
خالد قتل مسيلمة
لكن جنوده الكدابين
عينهم في طابا
يتحدوا فرسان الخطابة
ويلجموهم بالسكوت
في عصر بيروت الحزين
خالد قتل مسيلمة
لكن جنوده الكدابين
بيفتتوا دلتاك بصبر
وبيحفرولى في سينا قبر
وبيركبوا نيلي العنيد
وبيخنقوني في الصعيد
بكلام نكت وبتريقه
فارجع بأه
دا الهزل زاد
والباشا إيده على الزناد
وصدقي بيصلي لفؤاد
وبيحلفوا نرجع عبيد
نتباع في أسواق الكساد
الهزل زاد
والباشا إيده على الزناد
والسد جوه الفوهة
لو ينسفه تغرق بلادك كلها
وتعود سنين الأوبئة
تسكن ضلوعنا الضيقة
فأرجع بأه
الشمس سكنت كل غرب
حلفت ما ترجع للشروق
من أي شرق
إن لم تكن في الانتظار
إنت وسيفك -والتتار تحت القدم-
فأقضى بصوتك على العدم
اعدل موازين الزمان
رتب نجومنا في الفضا
وأكسى وجوهنا بالرضا
بعد الشقي
دي الأمة لسه محتاجاك
والأرض لسه مهيأة
فأرجع بأه
جمال بخيت
جمال بخيت
