أنا المصري
عبد الرحمن الابنودي
أنا المصري كريم العنصرين
سليل المخلصين المؤمنين
وحامي الأمة في وقت الشدايد
وشقّاق السكك للواردين
ودمي ملك ليكم أجمعين
أنا المصري كريم العنصرين
فقدت العقل والصوت والإيدين
وبعد ما كنت وقفة وروح ونجدة
مانيش عارف نسيت ده كله فين
ومين اللي سلبني اسمي؟ مين؟
أنا المصري كريم العنصرين
وكنت أصرخ
أطفي النار بصوتي
ويحيي أمتى في الشدة موتي
فمين اللي كتب عاري في جبيني؟
ومين اللي سرق شعلة سكوتي؟
وأنا اللي غُناي صحا العالمين
أنا المصري كريم العنصرين
أنا متباع
ماهيش عادتك يا وطني
عدو لعدو
ومين ما قبضش ثمني؟
صبى البقال يتاجر في الضماير
وأحلى عمري ضاع مستني زمني
بقينا بصمت موتنا مكتفين
أنا المصري كريم العنصرين
كأن الوحل شدّ الرجل مني
أنوح وأبكي وأنا قاصد أغني
واقفين عالشطوط بأيادي سودا
محال ح يغرقوني غصب عني
ولو نصبوا في قلبي مئة كمين
أنا المصري كريم العنصرين
بنيتها من الهرم للسد
يدي بنيتها كلها في لحظة تحدي
وكنت زعيم نبيل
ما بين جيفارا وتيتو وكاسترو
ونهرو وغاندي
ومش محتاج أقول أنا كنت مين
أنا المصري كريم العنصرين
وكنت أخطب تصيب الدنيا ربكة
ومن لبنان يعود أسطول أميركا
ولينا في الوجود كلمة ومكانة
وأخوة في الأمل
دمعة وضحكة
ورقابنا الأبية مرفوعين
أنا المصري كريم العنصرين
وجونا اللي رمونا للمهالك
تقول لأ
يقولو لها: وأنتِ ما لك؟
نقول لبنان أحبابنا الأعزة
يقولوا يغوروا
وتغوروا كذلك
نسيت من همي أبقى ازاي حزين
أنا المصري كريم العنصرين
بعنا كل شيء يتباع بدقة
بشفافية
ومن غير أي سرقة
ونظرنا لعلم النهب
صرنا بننهب ل شيء لكن برقة
بقينا دكاترة وسط النشالين
أنا المصري كريم العنصرين
وده يسلم لده
والعصر فاجر
وتاج حنت
سلمنا لتاجر
وأم الأمة مصر الإنسانية بتتآمر
وبتداري الخناجر
وكنت النجدة
واستنجد بمين؟
أنا المصري كريم العنصرين
وكنت أصرخ وكان الكل يسمع
وأمد الإيد عدو الأمة يرجع
وجاني النطع يؤمرني يشخط
وخلاني بقيت في الحق أنطع
أنا اللي نت أصحي الغفلانين
أنا المصري كريم العنصرين
وكانوا يقولوا: مصر
الشمس تطلع
وتعلا رقابنا فوق وعيوننا تلمع
وكنا نشيل قلوبنا فوق كفوفنا
وبصدورنا نواجه أي مدفع
فمين ساعدنا عالوضع المهين؟
أنا المصري كريم العنصرين
وازاي النهارده الدم عومي
مقلقل صحوتي وساكن في نومي؟
دمانا بتشتعل في أرض غزة
ولبنان ناره ماسكة في هدومي
وأنا اللي في الأسى واقف ما بين
أنا المصري كريم العنصرين
ولولا الأنظمة العربية لامت
وفي صفوف العدو ح تكون وكانت
ما كان الموت عرف صور ولا قانا
ولا كانت قيامة الغدر قامت
ولا قلب العرب بيّت حزين
أنا المصري كريم العنصرين
وناس لبنان بترحل من جَنوبها
ونوم الليل ما بيعرف جُنوبها
سطور النمل زاحفة للملاجئ
وريح الخونة ما هدّت هبوبها
ألوف راحلين في قلبي مذعورين
أنا المصري كريم العنصرين
فيا لبنان.. أنا أول من خانوك
يا حزب الله حكامنا باعوك
يا صاحبي ما عدا نملك غير هتافنا
هتافنا مرّ مالي رقابنا شوك
وعلني بنفعل الفعل المشين
أنا المصري كريم العنصرين
يا نصر الله
ده زمن البياعين
وأنت طلعت للأمة منين؟
تفكرنا بكل اللي نسيناه
أظنه صعب يصحوا الميتين
وخليتنا الجميع متفرجين
أنا المصري كريم العنصرين
مازال نفس العدو
ومازال خبيث
أبونا مات وسابهولنا وريث
ومهما يلف ويدور رح يغور
واسأل عندنا بيوت السويس
حلاوة روح وحياة الحسين
أنا المصري كريم العنصرين
بقت رايتك خلاص رمز لجهادك
بقت رمز المقاومة في بلادك
ولبنان كلها بايتة في ضميرك
خلاص صبح الجهاد ماءك وزادك
لغير المسلمين والمسلمين
أنا المصري كريم العنصرين
بلاد الأمريكان احنا وصهاينة
وصمتي ع اللي حاصل كله معنى
مازال الحلم لا مفارق دمايا
على رغم اللي عاشوا طعنة طعنة
يا لبنان الكرامة لا تلين
أنا المصري كيم العنصرين
ويا لبنان ما تطفيش نار نضالك
رجلك، حتى لو ماحناش رجالك
بحور الدم ما تغرق حقوقك
ولا تكسر مجاديف احتمالك
حبيبك
بس مش قادر أعين
أنا المصري كريم العنصرين
ليست هناك تعليقات:
إرسال تعليق