الجحش والحمار
قنبلة أحمد فؤاد نجم
الجحش قال للحمار
يابا اديني الحنطور
يابا انت سنك كبر
كح الحمار كحة
فزعت لها الركاب
مش يا بني بالصحة
ده كل شيء بحساب
وسواقة الحنطور
محتاجة حد حكيم..
.وانت عينيك فارغة
همك علي البرسيم
قوللي تسوق ازاي
والتبن مالي عينيك
ده حتي حبل اللجام
واسع يا ابني عليك
اعقل وبطل طمع
لاتسخن الركاب
ما تجيش يا واد جنبهم
لا تبقى ليلة هباب
دول صنف ناس جبار
قادر مالوهش امان
يبان عليهم وهن
لكنهم فرسان
يابا دا نومهم تقل
وبقاله يابا سنين
كل البشر صحصحوا
ولسه دول نايمين
يا جحش بطل هبل
وبلاش تعيش مغرور
ركابنا مش اغبيا
ولا عظمهم مكسور
بكرة حيصحولك
ويزلزلوا الحنطور
وتلاقي في قفاك
تمانين خازوق محشور
شعر احمد فؤاد نجم
ليست هناك تعليقات:
إرسال تعليق