الواد كبر
جمال بخيت
ابني العظيم ابني الجميل
ابنى اللي قادر ينتصر على المستحيل
الدنيا قاعدة ف مجلسه
وله مهابه يحسها كل البشر
و اللي ف هواه اتنفسوا
كل الكبار .. ولاّ الصغار
لو قربوله ..
بيهمسوا
كلماته شعر
مفتي .. وعالم عبقري
كوم التراب يصبح دهب
لو لمسة واحدة يلمسه
الواد كبر
تجيبوله جيش .. هايطوره
تجيبوله عصر من الجهالة
ينوره
تجيبوله سد ..
بطرف إيده .. يهندسه
الواد فهم
من غير ما حد يعلمه معنى العلام
من قعدته ف مجلسي
درس الحروب قبل السلام
هضم المذاهب كلها
سَرّبت له بين السطور
علم النفور والانسجام
علمته ينظر للبشر
وف عينه مليون اتهام
يرمى بذور الخوف ف دقة قلبهم
ومن الوشوش
يحصد نسيم الابتسام
الواد كبر ..
وكبر معاه وطنه الأشم
الواد كبر ولازم له هم
ولازم له قصر
ولازم له عرش وصولجان
وحدود وحاشية ومهرجان
ممكن كمان
سيرك وجنينة حيوانات
سجن ومعارضة .. وتضحيات
وحزب من اهل الكلام
يدبجوله ف الخطب
ويحفّظوه بعض النصوص
وهيلمان وزرا ولصوص
شوية منهم يسرقوا
وشوية ياخدوا حقهم
لما يوزع ف الوطن ويفرقه
قلب الوطن .. لجل التخين
راس الوطن .. لجل الكهين
داعر لطيف
اكبر حرامي ومدعي انه الشريف
عين الوطن ..
معروفة طبعا لجل مين ..
للمخبرين ..
الواد كبر .. ولازم له شعب يهرسه
وقانون عظيم
بإشارة واحدة ينشره
واشارة تانية .. يحبسه
ولازم له منهج حكم
- لكن معتبر –
ع الخوف ضروري يأسسه
ولازم له كلب من الصحافة
يمدحه ..
وف وقت عوزة ..
يقدسه ..
وينزهه عن الغلط .. أو العبط
وف عز اصعب وقت ف ليل الوطن
يقعد معاه ..
يونسه
ويجيب له شمس .. تشمسه
الواد كبر
وصبح علامة للنبوغ ..
الواد خلاص قرب يطول
سن البلوغ ..
ولازم له كرسي ينجسه
ولازم له مجلس للموافقة والسكوت
وان يوم نسي وطلع له صوت
يتربسه ..
ولازم له كهان للثقافة
عند اللزوم
يتمومسوا ..
ولازم له خُدام .. للنظام
على الجميع يتجسسوا
ولازم له حبة بلطجية من التقال
أولاد حلال
جوه المظاهرة ينكسوا علم البلاد
ويهتفوا بحب الفساد
ويلزقوا ف مُزز المعارضة
يقفّشوا .. ويحسسوا
الواد كبر
واظنه زيي
ما لوهش قلب
والحكم حلو وابن كلب
كفاية شكل الحاشية
لما بيسجدوا
من غير سجود
ساعة ما يعتبروا الرضا منى
صعود
أو لما ياكلوا ف بعض
علشان يفوزوا ببسمتي
وسط الحشود
يتنططولي ويرقصوا زي القرود
الواد كبر
ولازم له حلم يمتعه
ولازم له حصة تشبعه
ولازم له حاشية يبرطعوا
يترّبعوا
يتطمعوا
يدّلعوا
واذا واد معارض
حب يعمل فيها مسمار
يخلعه
يقلع عينيه .. ويأدبه
وف أي صحرا
يقلّعه
الواد كبر
واياك يا شعب تزهقوه
أو تقرفوه
وتطلعوله من النكت
زي اللي طلعت عن أبوه
اسمع يا واد
الشعب ده ..
وضع أساس النمردة
وإياك ف مرّة تدلعه
اكبس عليه ..
يا تركعه .. يا تطمعه
اسمع يا واد
اول دروس حب الوطن
سيب اللي نادوا باسم غيرك
يولعوا
وسيب مصارين بطنهم
- من حقدهم -
يتقطعوا
اسجد لآلهة الحياة
وافتح لهم باب البلاد
هاتفوز بأسباب النجاة
وتفوز بأرواح العباد
اسمع يا واد
أول دروس حب الوطن
ما ترتبطش بالوطن
ولا ف سر ..
ولا ف علن ..
وحب نفسك أولاً ..
سيبه يجوع
يعطش .. يغيب ..
أو يتفلق
انت الحقيقة الثابتة
من قبل هو ما يتخلق
اسمع يا واد
إياك تصدق
ان فيه حاجة اسمها
حب الوطن
العرش اكبر م اليقين
العرش .. دين
العرش هو اللي جعلّك مخلصين
بيوحدوك
العرش للحاكم وطن
والناس عشانه يقدسوك
أو يشنقوك
اسمع يا واد
انا هنا لآخر نفس
من غير شكوك
ها تقولي : ليه ؟!
العرش جنة خُلد للجالس عليه
جنة خصوصي للأباطرة والملوك
ولو جلست انت عليه
كل الرعايا ..
ها يتركوني ويتبعوك
وانت
- بدون احساس بذنب -
من نشوتك
ها تبيع أبوك
ليست هناك تعليقات:
إرسال تعليق